Kum 2011 Hospital Sunday kan lo thleng leh ta a, kan Hospital pawh a kum 83-na lai a lo ni ta, hetiang hun min hruai thlengtu Pathian hnenah lawmthu awm se la, he hun hmangtu Kohhran mipui zawng zawngte Hospital-a thawktuten Lal Isua hmingin chibai kan buk a che u. Hospital-in kum 2010 - 2011 chhunga kan sum hmuh zawng zawng chu Rs. 16,22,05,806.60 a ni a, hemia Rs. 1,24,30,000.00 chu Synod Grant a ni a, Rs. 14,73,42,280.00 hi Hospital-in a dehchhuah a ni a, a bak Rs. 24,33,526.00 hi thilpek a ni. Hemi kum chhung veka kan hman ral chu Rs. 16,16,28,991.00, a hming chuan Rs. 5,76,815.00 hman bang a la awm a ni. Kum 2001-ah SEC-in Hospital chu thawktu hlawh leh mamawh dangte intum tura a lo ruahman angin tunah hian hlawh leh nitin mamawh chu kan thawkchhuak thei tawh a, Synod Grant kan hmanna chu in sakna, khawl leina leh rethei tanpuina - Charity Fund atan a ni. Charity Fund-ah Rs. 46,16,841.00 zet hmang mah ila 31st March, 2011 account kan khar chuan damlo awmman pe thei lovin min batsak chu Rs. 1,49,61,777.00 a ni.
1. Damdawi In Chanchin Tlangpui :
(1) Khum awm zat - Damdawi Inah - 300; Hospice (AIDS veite enkawlna) - 20; A vaiin - 320
(2) Thawktu nghet : (a) Doctor - 27; (b) Nursing Staff - 105; (c) Thawktu dang - 107; A vaiin - 239
(3) Thawktu nghet lo : (a) Doctor - 3; (b) Nursing Staff - 64; (c) Thawktu dang - 41; (d) Convenant Year - 31; A vaiin - 139
Thawktu zawng zawng - 378
2. Thawktu nghet lak tharte : Asst. Librarian - 1, Staff Nurse - 1, Medical Officer - 3 leh Grade IV - 1, an vaiin mi 6 a ngheta thawk tur lak an ni.
3. Retreat : Thawktu pual retreat neih a ni a, Speaker atan Rev. F. Lalrinnunga, Director, SMTC chu hman a ni. Thupui ‘Rinawmna’ tih a ni a; tin, Covenant Year leh Nurse zir thar turte pualin Retreat neih a ni bawk a, Speaker atan Rev. C. Lalbiakhluna leh Rev. R.S. Rokima, Chaplain-te hman an ni.
4. Mobile Clinic : Nikum Hospital Sunday leh tun inkar chhungin Pastor Bial, Kohhran leh khaw hrang hrang 74-ah Mobile Clinic neih a ni a, damlo 7687 en an ni. Project hrang hrangah hma kan lak avangin thawktu kan indaih lo em em a, chuvangin min sawmtu Bial leh Kohhran zawng zawng kan tlawh thei lova, pawi kan ti hle.
5. Charity Fund : April 2010 atanga March 2011 chhunga Charity Fund atanga sum kan hmuh zawng zawng chu hetiang a ni :-
Synod Grant - Rs. 30,00,000.00
Hospital Sunday - Rs. 5,00,000.00
Thilpek - Rs. 11,16,841.00
Total - Rs. 46,16,841.00
Thilpek hi Kohhran, pawl leh mimal pek khawm a ni a, a vai hian damlo rethei awmman pe thei lo mi 730 hnenah hman zawh vek a ni.
6. Blood Donation : Kohhran, KTP, YMA leh tlawmngai pawl hrang hrang hnen atangin nikum Hospital Sunday leh tun inkarah thisen unit 4231 kan dawng a, damlo thisen mamawhtute tana thilpek hlu tak min petute zawng zawng chungah lawmthu kan sawi tak meuh meuh a ni.
7. Thilpek Hrang Hrang Kan Dawnte : Pastor Bial, Kohhran Hmeichhia, KTP leh tlawmngai pawl hrang hrang hnen atangin thilpek chi hrang hrang damdawi in mamawh —Hmunphiah, Swabstick, Thuthlengsei leh thildang engemawzat kan dawng reng a, damdawi in mamawh nasa takin min phuhruk sak a, kan lawm hle a ni.
8. Eye Unit Report : a) Outreach Camp :Khaw hrang hrang 5-ah neih a ni a, mit 198 zai a ni. b) Base Hospital Eye Camp :Vawi 7 neih a ni a, cataract 365 zai sak an ni.
9. Zir Mek leh Zirleh : Tunah hian MBBS zirlai 2, Internship timek 1, PG Course zirleh mek Doctor 3, M.Sc. (Nursing) zir 3, M.Sc. (Microbiology) zir 1 an awm a, tha taka an zir zawh theih ngei kan beisei.
10. Nursing School : Tunah hian zirlai 89 kan nei mek a, an zirlai zirzo (Covenant Year) 31 an awm bawk a. Nursing School tluang takin a kal zel a, result pawh a tha thin hle a ni.
11. C.T. Scan : Synod thurel angin CT Scan lei tura hma lak mek a ni a, a dahna tur hmun pawh tihfel a ni tawh a, July, 2011 thla chhung hian kan nei hman tura beisei a ni.
12. Hospital Mamawhte : Tun dinhmunah Hospital-in kan mamawh berte chu Doctor thiam (Specialist) te an ni a, heng a hnuaia mite hi kan mamawh zualte an ni :-
1) Surgeon Mi zai thiam
2) Anaesthesiologist Hnimhlum pe thiam
3) Radiologist CT Scan, X-ray, Ultrasound thiam
Kum 2009 Synod-a CT Scan khawl lei rawt a nih lai khan Radiologist tha tak kan nei a, amaherawhchu kan hlawh pek theih aia tam hlawhna turah min kalsan leh ta a, chutiang bawkin mi zaithiam (Surgeon) leh hnimhlum pethiam (Anaesthesiologist) te pawh kan mamawh em em chungin rawn thawk duh kan la hmu lo a ni.
THUCHAH
Thupui : Nat tinrenga nate a tidam Chhiar tur : Marka 1 : 29 - 34
Thupui then : 1.
‘Tin, inkhawmna in ata chu a chhuahin’
Hna thawh tur a awmin kan Lal Isua a chawl ngai lo, mamawhtu an awm chhung chuan a hna thawh tur a thawk zel thin. Chang hmasa lama a lan danin hemi ni pawh hi chawlhni a ni a, hun engemaw chen chu an inkhawm tawh a, chawhma lam zawng pawh a ni thei e. Inkhawm banah chuan han hahchawlh a, engemawte pawh han eina huna hman awm tak anih laiin, a mamawhtute’n an mamawhna a hria a, chawlh pawh chawl hman lovin chumi lam chu a pan ta a ni. Keini Amah zuitute pawh hian zir tur pawimawh tak helaiah hian kan nei a, min mamawhtute an awm a, tanpui ngai tanpui turte an awm chhung chuan ‘mahni hrehawm pawisa lovin’ a tulnaah chuan kan Lal Isua hnungzui hi kan tih tur a ni.
2 .‘...tichuan, a chanchin chu Isua an hrilh ta nghal a’ A zirtirte hian kan Lal Isua hi an la zui rei lo hle nain, chutichung chuan harsatna an tawhte A hnena thlen nachang an hria hi an fakawm hle a ni. Tun tumah pawh Petera pizawn a damlova, chhungkua a buaiin hna pawh a sawt lo a ni ngei ang, ‘Pitar khawsik chu a dam veleh mai ang’ tiin ngawihbopui ta mai se chu tun ang hian a dam mai lovang a, hun engemaw chen chu a buai pawh an buai zui ngei ang. Amaherawhchu, an buaina leh an duhnate chu a thlenna tur dik takah an thlen vat a, Aniin awlsam takin a lo chinfel sak ta mai a ni. Kan harsatna te, kan buaina te telua awm lovin a chingfel theitu tur kan Lal Isua hnena thlen thuai hi kan tih tur a ni tih i hre reng ang u.
3. ‘...tichuan a khawsik chu a reh a, an rawng a bawlsak ta a.’ Helai changah hian thil pahnih pawimawh tak tak zir tur a awm.A pakhatnaah chuan kan Lal Isua tihdamte an dam chianzia a ni a. Pathian tihdamna chu chawplehchilhin a lo thleng nghal a, a lehpek awm lovin an dam nghal a, damna famkim an chang nghal a ni.A pahnihnaah chuan Petera pizawn hian a tidamtu a hria a, a tihdam chhan a hre chiang bawk. Pathian khawngaihna a chunga lo thleng hi midangte tanpui theih nan a ni tih a hria a, chuvangin damkawr pawh awm lovin a thova, an rawng a bawlsak nghal a ni. Pathian khawngaihna kan dawnte hi keini tan bik a ni lova, midangte rawng kan bawl ve theihna tur zawk a ni. A malsawmna kan dawnte pawh hi midangten malsawmna an dawn theih nan a ni tih hi i hre tlang ang u.
4. ‘...nat tinrenga nate chu a tidam a’ Presbyterian Hospital din chhan (Mission Statement) pawimawh tak chu ‘Damlo tinrengte, thliar bik nei lova, an mamawhna ang zela eng hun pawha enkawl’ hi a ni. He rilru hre reng hian kan Kohhran pawhin vawiin thleng hian ‘nat tinrenga nate’ enkawl nan hma a la zel a ni. Damdawi in din tirh laiin TB enkawlna Mizoramah a la awm lo a, a tulzia hriain theihtawpin hma a la a, Wales ramah te thawhlawm khawnin TB Ward a sa a, X-ray khawlte a lei bawk a, TB veite, kha tih laia an thinhrik hialte tam tak a enkawl dam a ni. Tin, rilru lama harsatna neite enkawlna a awm loh avangin, Kohhran Hmeichhe Khawmpui lian kaltlangin ‘Finna Ward’ te sak a ni a, hetah pawh hian tam tak enkawl dam an ni. Sawrkar-in heng natna enkawlnate a siam hnuah chuan an kutah dah a ni ta. A tulnain a nawr ang zelin mipuite mamawh phuhruk nan hma thar lak zel a ni.
Ruihhlo ngaite leh an inchiunain a tihbuaite enkawl nan Khawngaihna (K) Ward pawh hawn a ni a, mi tam takin damna an changin hetiang ward hi India ramah pawh a awm chhun a ni. Tin, AIDS veite an lo awm takah chuan an enkawlna bik turin ward hran hlak ‘Grace Home’ pawh sak a niin tangkai taka hman zel a ni.
Tin, damdawi in awm man pawh hi mi rethei ber berte pawhin an ban phak turin a hniam thei ang ber (subsidized rate)-in siam a ni a. Amaherawhchu, kan khawsakte a lo harsat chhoh em avangin mi tam tak chuan hei pawh hi an pe thei lova, chuvang chuan kum 2010 - 2011 account 31st March, 2011-a kan khar chuan Rs. 1,49,61,771.00 zet min batsak a ni.
Hengte pawh hi ngaihtuah chian chuan damlo tinrengte enkawl tura din a nih angin kan Kohhran chuan damdawi in hi hetiang zawng hian a la kalpui reng a ni tih hi kohhran-hote hian lo hre thar leh ila, kan kut te, kan theihna leh thiamna te leh kan thawhlawm te hmangin kan Lal Isua’n ‘nat tinrenga nate’ a la tidam reng a ni tih i hre tlang ang u. Lalpan malsawm che u rawh se.
Dr. LALREMTHANGA
Secretary, Presbyterian Hospital Board. & Director,
Mizoram Presbyterian Church Synod.
Rev. C. LALSANGLIANA
Chairman, Presbyterian Hospital Board & Synod Moderator