Introduction : Sekmaijin khua hi Manipur Mission Field chhunga Mayang Imphal Pastor Biala awm a ni a. Imphal atanga 25 kms. vela hlaa awm a ni. Sekmaijin khuaah hian Kristian member 50 vel zet an awm a. Evangelist L. Ragumani (Meitei) a awm a, Bialtu Pastor chu Rev. L. Iboyaima a ni. Mission Quarters a awm a, chu chu Evangelist L. Ragumani te chhungkua hian an luah a. Quarters bulah chuan Biak In (Republic Veng Kohhranin an sak sak) chu a awm bawk a.
Evangelist Qtrs. atanga hla lo teah hian Meitei puithiam nu (maibi), kum 56-a upa, Chirom Ongbi Memcha Devi (Pi Memcha) a awm a. Pi Memcha hi hun rei tak chhung hrisel lohnain a tlakbuak a. Kal leh chet vel pawh harsa a ti a. Chutianga chaklo taka awm chu Kohhranho tawngtaina avangin a lo dam ta a, a lawm hle a. Kristiante Pathian chu Pathian tak leh rintlak a ni tih hriain a ring ta a, a pathian, sanamahi pawh a hal raltir ta nghal a ni. 30th. April (Sunday) khan Pastor L. Iboyaima kutah Baptisma pawh a chang ta nghe nghe a ni.
Buaina lo Intan Dan : Pi Memcha chhungte chuan an chhungkaw pathian, sanamahi chu siam leh turin an ti a, mahse Pi Memcha chuan a siam duh tawh lo va. Chutia sanamahi a siam duh tak lovah chuan an thin a rim a, a puanthuahte theh chhuakin amah pawh an hnawtchhuak ta a, an khaw thenawm, Uchiwa-a a unau nu hnenah a awm ta a.
Ni 1.5.’06 zan lamah chuan aurinna hmangin mipui an au chhuak a, an fuihpawrh a. Khaw mipui chu naupang atanga puitling thlengin an lo chhuak a, “Kristianten kan pathian, sanamahi an hal e, that rawh u, hal rawh u, an Biak In pawh hal rawh u” tiin an au dur dur mai a. Evangelist L. Ragumani chu May ni 3 -a chhuak ngei tur leh Mission Compound pawh Club hnena hlan turin hming an sign luihtir ta a. Vantlang inkhawm zawhah pawh chuan Evangelist Quarters chu mi engemaw zatin an hual a, “zaninah chhuak nghal rawh” tiin an au va, Biak In chu lungin an vawm bawk a, a chung hmun 2-ah an vawm thler nghe nghe a ni. Zan lam a nih avangin Police pawh an thleng ngam dawn chuang lova kan hriat avangin police-ah kan report duh ta lo va.
He thil thleng chanchin hi Bialtu Pastor-in a hriat veleh phone-in min rawn hrilh a, Imphal Mission Compound-a awmte chu hrilhin tawngtai inkhawm koh nghal a ni a. Bial hrang hranga mite pawh kan phone theih theih phone-in tawngtai inkhawm buatsaih nghal tura hriattir an ni bawk a. A tuk ni 2.5.’06 chuan Pu H. Zothanpuia, O.A, Pu P.C. Lalmuankima leh Pu H. Bharat Meitei te nen Sekmaijin lam panin kan tlan chhuak nghal a. Mayang Imphal Pastor Quarters-ah kan lut hmasa a, Pastor te nupa bakah Missionary Lalropari leh member thenkhat an lo awm a. Thil awmzia tlangpui Pastorin a sawi zawhah tawngtai rualna kan hmang a, Sekmaijin lam panin kan kal ta a.
Sekmaijin Quarters-ah chuan Kohhran member thenkhat pawh an lo awm a. Thuamhnaw an lo tel a, chhuak turin an lo insiam diam a. Kan hmel an han hmuh chuan an tap hawm hawm a, “chhuak lo hram rawh se, an thiam loh pawh a ni lo va, tuar a tul leh kan tuar tlang ang a, thih a tul a nih pawhin kan thi tlang mai tur a ni”, an ti a. Tawngtai rualna hmanga Pathian kan rawn hnuah Tirhkoh chu chhuak rih lo turin kan rel ta a. Bial programme dang cancel-in Sekmaijinah chuan tawngtai programme hman ni se a thain kan ring a. Pathian thua kan inthlamuan hnuah kan hawsan ta a.
Pu Vanupa Zathang (Pu Vantea), IGP ka phone nghal a, kan boruak tlangpui chu hrilhin police lam pawhin an lo bengvar theih chuan lova bengvar tura Thoubal SP min lo hrilhsak turin ka ngen nghal a. Amaherawh chu thil a fel mai theih kan beisei avangin Case File chu tul lo turah kan ngai deuh a. Pu Vantea pawh chuan Thoubal SP lo phone nghal a tum thu chu min hrilh bawk a. In kan thlen hnu lawk chuan Pastor L. Iboyaima chuan min rawn phone leh a, “Pu.Ragumani fanu khan a hlau hle mai a, chhuak thuai thuai turin a pa kha a nawr ve bawk si a, engtin nge kan tih ang”, a rawn ti a. “Chuti a nih chuan hmeichhia thlabar lutuka dah chu a tha lo ve, in Compound lamah khan lo va hruai phei mai ula, Pu Ragumani chu Evangelist dang 2-in emaw lo riahpui mai se la a tha ang e” ka ti a. Tin, Underground lam an inrawlh bawk si avangin Police han pun pawh chu a hlauhthawn thu a rawn sawi tel bawk a, mahse IGP ka phone tawh thu ka lo hrilh a.
He thilah hian Underground lam pawh an inrawlha hriat a nih avangin Pastor chuan an Kohhran Upa leh Egangelist thenkhatin Underground hruaitu hmelhriat an neihte lo va dawr an duh thu a rawn sawi leh a, tha an tih anga lo dawr tura kan inhrilh hnuin an lo va dawr ta a. Anni chuan, “in thiam loh a ni lo tih chu kan hria a, mahse mipui an sosang em a, engmah a tih theih rih lo a ni, theihtawp kan lo chhuah ang e”, an lo ti a. Tin, keini lam pawh hmun hrang hrangah tawngtai inkhawm buatsaih a ni a, School leh Office thlengin hemi ni hian tawngtaihona hun hman a ni. Tin, a tuk ni 3.5.’06 chuan Club leh DESAM hruaitute an biakna chanchin pawh Bialtu Pastor chuan min rawn hrilh leh nghal a, “Eng pawh ni se, ama thu intiam ang khan chhuak phawt sela a tha ang e, tichuan kan la inbe leh zel dawn nia” an lo ti a. Chuvangin Evan. L. Ragumani te chhung chu Mayang Imphal Mission Compound-a awm rih tura hriattir an ni a. Amaherawhchu Evangelist thenkhat leh Upaten Quarters chu vengin riahchilh rih sela a thaa kan hriat avangin a riak tur pawh an insiam a. Ni 2 leh ni 3 hi chuan boruak danglam engmah a awm lo va.
Boruak pawh dai leh mai turin kan beisei a. Account Training leh Charter Audit tura koh kan nih avangin Aizawl kal kan ngai a, tin, Ngangkha Kohhran Committee member-te ni 6 leh ni 7 hian Champhai Kohhran tlawha zir turin an kal dawn a, chungte chu hruai nghal turin kan inti bawk a, anmahni phei chu ni 1.5.’06 khan an chhuak daih tawh nghe nghe a. Ni.4.5.’06 chuan Zoram lam panin kan chhuak ve ta rih a.
Biak In tih chhiat a ni : Ni 5.5.’06 chuan SMS-in Biak In an tihchhiat thu min rawn hrilh a. Ni 4.5.’06 zan dar 7:30 velah mipuiin Biak In chu an rawn tichhia a, Quarters pawh tihchhiat nghal an tum a, tukverh 2 chu an tichhe hman a, Quarters nghaktuten an lo danna lamah kut pawh an tuar hlek awm e.
Pastor PC.Lalbiaktluanga Imphal leh Pu Lalrinliana, BTI Director te nen Telephone-in kan inbe thei deuh reng bawk a, Pu Vantea, I.G.P, Pu Songboi Judicial Magistrate, Pu Saichhuana, IAS leh Pu PL.Thanga, IAS te lo va rawn a, a tul anga Presbytery Committee pawhin hma lo la turin kan inrawn a. Chutiang chuan biak rawn awm awmte be rawnin Presbytery Standing Comt. pawh an ko va, Kakching Police Station-ah FIR pawh thehluh a ni bawk a. Upa PC. Lalengmawia, Lamphelin a tul ang angin a lo tanpui bawk a.
Quarters hal a ni leh : Ni 6.5.’06 Inrinni zan inkhawm banah phone ka dawng leh a, “Evangelist Quarters pawh an hal leh ta” tih min hrilh a. Zan lamah mi 5 vel kalin Quarters hi an va hal a ni. Champhai Vengthlang Kohhranin nasa takin tawngtaina an hmang a. Tin, Veng dang dangah pawh a theih anga hriattir zel a ni a, kohhranho ten nasa takin an tawngtai a ni. Bethel Kohhran Biak Ina Champhai Area Non-Mizo Christian Convention hmangtute pawhin he thil thleng pual hian tawngtairualna hun an hmang nghe nghe a ni.
Ni 7.5.’06 Pathianniah phone ka dawng leh a, ‘Case I.O pawhin Kristiante tihchhiat angin report a pe’ tih leh ‘Sekmaijinah Public Meeting an ko va kan Kohhran member, M. Gogon chu, “Quarters chu keima hal a ni”, tia video camera hmaa sawi tur leh ziaka hming sign turin an nawr a, mahse ani chuan a ti duh lo’ tiin. Kut pawh an thlak a, “Police-ah Case in siam chuan Kristianten in tuar ang a, khawtlangin kan ensan ang che u a, Mission Compound-ah Biak In leh Quarters in sa thei lo vang a, Club-in kan nei ang”, tiin an vau zui bawk a.
Inremna neihpui an ni : Ni 9.5.’06-ah phone ka dawng leh a, Pu Christopher-a DIG, Thoubal thurawn angin negotiation neihpui thain kan hria a, enge i ngaihdan an rawn ti a. A remchan dan anga hma lo la zel mai turin kan inhrilh a. Chuti chuan ni 9.5.’06 hian Kakching-ah negotiation an lo va neihpui ta a ni. Chuta an inremnaah chuan Kristiante chu an member-te inah chuan an inkhawm thei ang a. Mipui rilru a la dam loh avangin Biak In leh Quarters sak chungchang erawh chu la inbiak chhunzawm leh zel tur a ni ang.
Tlangkawmna : Sekmaijin khaw mipuiin an huat ber chu an pathian sanamahi hal leh sanamahi leh an biakna hmanruate Setana thil leh ramhuai thil anga Kristianten an zirtir nia an hria chu a ni.
Heng ang buaina hian Kohhran tibuaiin tithlabar hle mah se, buaina leh harsatna karah Pathian awmpuina leh a hnathawh erawh a lang zelin kan hria a. Kohhranhote pawhin Pathian an hnaihin an tawngtai nasat phah a, tanrualna an neih phah bawk. Kumbi Kohhranah phei chuan he thilthleng avanga tawngtai inkhawm an hman laiin taksa chetna a thleng a, tawngtai inkhawm pawh bang mai thei lovin Pathian pawlna an neih thute kan dawng bawk. Meitei zinga Thlarau Thianghlim harhna thlenna hmanrua lo ni se kan duh hle.
Sd/-
REV. PC. PACHHUNGA
Field Secretary
Manipur Mission Field
Copy for information to :
1. Synod Moderator
2. Senior Executive Secretary i/c Pastoral ministry
3. Executive Secretary i/c Mission
4. Synod Secretary
Sd/-
REV. PC. PACHHUNGA
Field Secretary
Manipur Mission Field