Christian Reformed Church in North America chuan kumin hian kum 150 a lo tling a. A lawmna pakhat atan Assembly of Worldwide Partners (AWWP), (khawvel hmun hrang hranga an kohhran thawhpuite inhmuh khawmna) a buatsaih a. Kum 150-na lawmna pui ber hmang nghal thei turin he hun hi ruahman a ni. Keini kohhran (Synod Mission Board) pawh an thawhpuite kan nih ve avangin, a bul atanga hma la tu leh thawhhona thuthlunga hming ziaktu ni ve ta chu min rawn sawm ve hlauh mai a, ka lawm hle a ni. Kum 2002 khan an hmunpui hi kan Missionary an College-a zirlai Pu Zaichhawna tlawh pahin ka lo tlawh tawh a. An Mission Office-ah te lengin Chanchin Tha hrilna kawnga thawhho dan turte ka sawipui a. Anni an lo phur bawk a, vawi hnih lai Mizoram an rawn tlawh hnuah thawhhona thuthlung kan ziak ta kha a ni a. Tunah hian Nepal ramah Missionary Nurse pali lai min chawm sak mek a ni.
June 7-10, 2007 chhung Programme hmang tura sawm ka ni a. Ka kal tur thu hi Synod News lam atanga hriain Rev JH Vanlalhruaia, kan Synod tirha Rudyard-a pastor hna thawk mek chuan an Presbytery hotute a lo hrilh a. Remchang takin Mackinac (Ma-kinaw) Presbytery rorel inkhawm hun nen a in hnaih avangin an Presbytery hotupa (Executive Presbyter) Rev David Van Dam, Mizorama thla hnih zet lo awm tawh khan an Presbytery-a Minister te chanvo ang changve turin he inkhawmpuiah hian min rawn sawm bawk a. Chung thil pahnih avang chuan June 4, 2007 khan Aizawl ka chhuahsan a. June 5-a Kolkata atanga Delhi ka pan chu ka thlawhna an tih tlai nasat avangin Amsterdam ka panna tur thlawhna (NW 8366) chu ka han nang lo pek a. Ka mangangin USA lam ka zu phone vat a, Delhi Field Secretary Rev Lalchhuanmawia min rawn lam turin ka va ngen bawk a. Airport ka chhuahsan hmain Rev Dr Garry Bekker, Executive Director-in min rawn phone a, naktuk tun ang huna ka kal lehna tur an tihfel tawh thu leh ticket pawh an rawn thawn nghal thu min rawn hrilh a, ka thaw huai mai. Kan Mission House ka thlenin ka e-mail ka han hawng a ka ticket thar tur chu a lo awm vang tawh a, ka lawm kher mai. Kan Field Secretary te chhungkua ka tih buai avang erawh chuan ka inthlahrung lutuk a, che mang lovin ka mu tlaivar a ni ber e.
Delhi-a ka tluang lo deuh tih loh hi chu ka zin chhung zawngin Pathian zarah tluang takin ka kal a. Grand Rapids ka thlenin amah Dr Garry Bekker ngeiin min lo hmuak a, mikhual dang an hmuahna Bus-ah pawh chuang lovin ama car-in kan hun hmanna tur Calvin College chhunga The Prince Conference Center ka thleng a. He Assembly-in a tum ber chu ‘Rawngbawlnaa kan thawhhonaah kan hmalam hun atana ruahmanna tha duang tura tawngtai leh sawiho’ a ni. Rev Gerald Dykstra, CRNA Executive Director chuan a hawnna thu a sawiah, “Tun hma chuan mahni niin hmalama tih tur ruahmanna kan siam mai thin a. Tun lai khawvel thang chak takah hian kan rawngbawlna pawh ‘Mahni seh seh mual hranah’ tih mai theih a ni ta lova. Khawvel pumpui thlira ruahmanna kan siamho a lo ngai ta a ni,” a ti. Chutiang rilru pu chuan Thupui vawi 4 kan ngaithla a, Workshop 11 neih a in bawk.
CRNA World Relief Committee huaihawtin HIV/AIDS vei te tana rawngbawlna tur sum tuak nan Gospel Concert buatsaih a in a. Keini palaiho chu ticket $ 20 (Rs 800) man min sem vek a. Inrinni (June 9) zan khan khawvela Gospel group lar SELAH concert chu beisei phak lohin live-in ka en ve ta a. Hla mai nilovin thuah pawh min chawm nasa hle mai. An zai chu sawi loh, an testimony leh an hlasak chhan an sawi ten min vel a ni ber e.
Kan Assembly kharna Inkhawm urhsun chu June 10 (Sunday) dar 10.30am-ah kan hmang a. Pathian thu nung takin Rev Paul Mpindi-an a sawi hnuah Lalpa Zanriah kil hoin kum 150-na lawmna pui ber, Synodical Worship Event neihna hmun tur ‘Van Andel Arena’ chu Bus 5 hmangin kan pan leh ta a ni.
Van Andel Arena hi stadium ropui tak mi singnga vel zet lenna tur a ni a. Thutna fel taka awm anih avangin he program-a tel tur pawh hian ticket neih lawk sa vek a ngai a ni. ‘Thianghlim, thianghlim, thianghlim. . .’ tih hla saa hawngin inkhawm urhsun leh ropui tak kan hmang a. Halelui leh Amen a ri tam ve hle mai. Sihdet (flashlight) te keng theuh turin min hrilh lawk a. Eng pangngai an han ti thim a, khawvela harsatna leh sual avanga thimna chi hrang hrang zingah kan eng zel dawn a ni tih lantir nan thu tiam neiin kan eng kan ti eng a ‘let it shine!’ tiin kan han au rual dual dual mai chu chak tharna tham tlingin ka hria. Sangrual zaipawl te zaiin, drama leh thuchah ropui tak te kan ngaihthlak hnuah Rev Dr Setri Nyomi, Gen Secretary WARC, Geneva in malsawm tawngtaiin min tin ta a ni.
Hemi tlai hian Rev JH Vanlalhruaia’n a car-in min rawn lam a, Presbyterian Church (USA) hmunpui tlawh tur leh Asbury Theological Seminary-a Associate Professor Rev Dr Lalsangkima tlawh nghal turin kan chhuak ta a. Zan dar 10 thleng kan tlan hnuin khua pawh a lo thim tan ta a kawng lak hotel-ah zanriah te eiin kan riak ta a. June 11 zing dar 9-ah chhuak lehin chawhnu dar 1-ah Louisvelle kan thleng a. PC USA-a Worldwide Ministry hotute Rev Insik Kim (Co-ordinator) leh Rev Tom Taylor, Executive Director te kan hmu thei a, a lawmawm hle mai. Tlai dar 4 velah Louisvelle chhuahsanin Lexington panin kan chhuak a, dar 5pm velah Pu Lalsangkima te awmna Wilmore kan thleng a. Tlai lamah Pu Sangkima In thar sak te kan en hnuin zan dar 12 thleng kan inkawm a. June 12 zing lamah a thawhna Asbury Theological Seminary leh Lexington City te kan fang a. ATS hi Methodist kohhran din chhuah Seminary upa leh hlun tak a ni. Seminary chawlh lai a lo ni a zirlai leh thawktu hmuh tur an tam lo. An classroom changkang, khawvel hmun hrang hranga Theological College zirlaite hnena lecture pek theihna te kan en a. He classroom-ah hian TV screen a awm fur mai a, zirtirtu TV-a an lo hmu ang bawk khan zirtirtuin a zirlai khawvel hmun dang ami te pawh hmu vein thu te pawh an in zawt tawnin thil sawiho theih a ni bawk a ni. Khawvel hi a te tawh hle mai. Classroom pakhata kan khung khawm theih hi an tamin a room pawh a zau sawt hle tawh a ni!
Chawhnu dar 1-ah Pu Sangkima te In kan chhuahsan a, tlai dar 8 velah Detroit kan thleng a. Pi Dinpuii (d/o Upa F Lallura, Electric veng) te Inah kan thleng a. Pi Dinpuii hi Mizo nu chhuanawm tak College-a Mathematics zirtirtu a ni a. Min thleng mai nilovin nau pawm chungin kan kal duhna hmun hrang hrangah a mottorin min hruai kual a, kan lawm hle a ni. Detroit atang hian June 13 chawhnu dar 2 velah Rev JH Vanlalhruaia thawhna Rudyard kan pan leh ta a. Tlai dar 8 velah kan thleng a, mahni In thleng ang maiin ka thaw huai mai. Pu Hruaia kohhran enkawl hi kohhran upa tak a ni a. An biak In pawh hi Pu Buanga te Mizorama an lo kal kum 1894-a sak tawh a ni. An kohhran an len vak loh leh an tlem deuh avangin an Pastor enkawlnaah pawh kohhran hlun dang an tluk pha lo hle a. Pastor hlawh an pek theih a tlem avangin Pastor pawh rei tak an nei thei lova. Pu Hruaiate chhung hian rawngbawlnaa ngaiin a hlawh leh thil dang thlir lovin an enkawl a ni a, an fakawm hlein ka hria.
June 14-ah chuan kan nau Achhuani (d/o Upa F Aibaka (L)) te tlawh turin Pu Hruaia te chhungkua nen Indian River lam kan pan a. Achhuani pasal Joshua Galett hian Baptist kohhranah pastor hna a thawk mek a ni. Mizorama ka tih ngai loh tur thil pahnih an lo ngaihtuah chu: Jetsky (tuipuia lawng(Bike) khalh) leh Golf khelh a ni a. A manhla kher mai. Zanah Pathian thu-a kan titiho chu zing dar 3 kan lo thleng reng mai a, a va nuamin a va hlawk thlak tak em!! Anni chhung hi Camp-a lut tura an chhuah ni a lo ni a, keini lah muangchang zui thei tawh bawk lo chu chhunchaw tui tak ei hovin kan in then leh ta a ni.
June 16-ah Presbytery Inkhawmpui hmang turin Rudyard atangin Petoskey kan pan a. Presbytery hi First Presbyterian Church, Petoskey-ah nghah a ni a. Mackinac Presbytery-ah hian kohhran 40 zet an awm a ni. He Inkhawmpui rorelah hian Corresponding Members pahnih kan awm a; an Synod of the Covenant aiawha lokal Rev (Mrs) Marie Cross nen kan ni. Rorel tan hmain Greetings sawi turin min ko ve a. PCI Moderator leh kan Synod Moderator te duhsakna te hlanin Mizoram Synod-in he Persbytery atanga tanpuina kan dawn SMTC atan te, ATC leh Hospital atana kan dawn te avanga lawmthu sawiin kan Missionary Pastor Rev JH Vanlalhruaia an lo dawnsawn that avanga lawmthu sawina te neiin kan kohhran dinhmun tlangpui reports ka pe bawk a. He inkhawmpui hian Asst Pastor tur leh Pastor atana nemngheh tur lakna (Interview) neiin nemngheh diltu phei chu sermon tawi an sawi tir nghe nghe a. Official zawhna bakah palaite’n zawhna hrang hrang an zawt a. ‘Lalpa tih hi finna bul a ni tih a ni a, Lalpa tih awmzia enge? Lalpa chu i tih em? tih te, Lal Isua hi Chhandamtu awm chhun ani tih i pawm em? Tunlai kohhrana harsatna lian ber enge nia i hriat? I kohhran enkawl turah kum 2/3 chhungin eng angin nge Thlarau Thianghlim hnathawh lo thleng tura i beisei? tih te leh zawhna dang tam fe an zawt a ni. Thu rel tak a tam lova, department hrang hrang reports leh rawtna bawhzui a ni ber a. Chawhnu lam phei chu Executive Presbyter, kum 14 zet he hna lo thawktu Rev David Van Dam thlahna hun atana hman a ni a. The Northmen Gospel Singers (Male Voice) patling 7 zet ten zaiin min awi reng a. Presbytery-in Peace-post an hlan a. Hei hi ban inches 3 bial vel, 7ft vela sei a hmawr zum a ni a. A ban pang tinah hian tawng hrang hrangin ‘Leiah remthu leng rawh se’ tih a in ziak a. German, French, English leh Mizo tawngin ziak a ni! Mizo tawnga ziak a ni ve hian rilru a khawih khawp mai. David-a te nupain Mizo te min ngaihnat ve zia te pawh a ti lang hlein ka hria.
June 17, 2007 (Pathianni)-ah chuan Pu Hruaia kohhran enkawl First Presbyterian Church, Rudyard-ah thu ka sawi a. Sap rual inkhawm, Zopa pahnihin kan han hruai vel chu insit a nat rualin nuam ve ang reng tak chu a ni. Pu Hruaia hi Missionary Pastor anga tirh chhuah kha a ni a. Missionary mamawh kohhran han nih chu tlawmah an la deuh tih thu ka hre thawi a. Chuvang chuan tun lai Mission chngchang te sawiin hmanlai chuan Missionary luan chhuah dan hi thlur khat (oneway traffic) a ni thin a, khawthlang atangin khaw chhak lamah emaw hmar lam atangin chhim lamah emaw Missionary te an thawk chhuak thin a. Tunlaiah erawh chuan hmun tinreng atangin hmun tinrengah missionary te an thelh ta sung sung a. India ramah missionary tam tak kan mamawh mek laiin India ram atanga missionary chhuak tam tak an awm bawk a. Nangni pawh in tlakhniam em avanga missionary mamawh ta inni lova, in theiha in duh phawt chuan Missionary tir chhuak ve ngei tur in ni ang. In theih phei chuan Mizoramah ngei pawh in rawn tir ve thung dawn lawm ni? tia ka sawi chuan sawi zui a hlawh viau tih Pu Hruaia hnen atangin ka hre leh nghe nghe a ni. Rudyard-ah hian Thawhtanni thleng ka cham a.
June 19, 2007-ah chuan Sault St Marie (Soo-san-marie) airport atangin Washington panin ka chhuak a. Detroit-ah ka thlawhna darkar khat zetin an ti tlai (delayed) ve tlat a. Washington (Dullas airport) chu 2pm-ah ka thleng ta chauh a. Washington-ah hian Pu K Laltluangkima’n Video Camera nen min lo hmuak a. Fiamthu leh thu tak in zat nawka kan han in chhawn vel chu Washington a ni ta lo emaw ka ti rum rum mai. Ani hian programme fel takin min lo duan sak a. World Bank-ah thianpa John Clayte-a hnena chaw ei tur te, White House, Capital, Monument, Lincoln Memorial leh John F. Kenedy thlan awmna Arlington National Cemetery (sipai thlanmual) tlawh kual dan tur te. Mizo Methodist kohhran hruaitute nena chaw ei leh Mizo Presbyterian kohhran nena chaw ei khama Mizoho te nena inkawmna hun tur nen lam min lo duan fel sakin hun tawi te daihzai takin min hman pui a, ka lawm takzet a ni. Nipui lai a ni a, khua a lum bakah ni a rei em em mai a. Zan dar kuaah pawh ni a la tla fel thin lova. Ka tih ve zen zen loh swimming pool-ah te pawh min kal pui a. A nuam hle mai.
June 21, 2007-ah Pu Tluangkima’n airport-ah min va thlah leh a. Detroit lamah thlawk kir lehin Detroit atang chuan Amsterdam lam panin June 22, 2007 zan dar 10:30-ah Delhi ka thleng a. Airport-ah chawlin June 23, 2007 tlai dar 3:30 velah tluang takin Aizawl ka thleng leh ta a ni.
Ka zin chhungin Pathian hruaina ka dawng nasa hle a. Min duhsaktu leh min buaipuitu tur thian tha tak tak te min pein mi ka tibuai nasa hle mai. Pathian zar vek a ni a. Tin, Zoram lamah bang lova min tawngtai saktu te, ka nupui fanaute buaipui an ngaihna apianga Pathian hmanruaa lo tang te avang pawhin lawmthu ka sawi a ni.