Tukin (July 18, 2017) zing dar 7:30 a.m. khan Synod Moderator Rev. Lalzuithangan Zuangtui Kohhran Biak In thar tur lungphum a phum.
Lungphum inkhawm hi Biak In thar hmun turah buatsaih niin kohhran mipui te kal an tha hle a. Synod Moderator Rev. Lalzuithangan lungphum phumin Pathian hnenah a hlan a, Bialtu Pastor Rev. H. Lalmuanchhanan malsawmna in hun a khar a ni.
Zuangtui Kohhran Biak In luahlai hi June 23, 2017 atang khan a in nghahna lei a chet avangin luah chhunzawm ngam a ni tawh lova, tunah hian PWD Godown hluiah an Inkhawm mek a ni. Biak In hmun thar tur hi cheng nuai 110 a lei niin Synod in nuai 66 a tum sak a, Zuangtui Kohhranin nuai 44 an tum thung a ni. Biak In sak bul tan nan Synod hian cheng nuai 15 in a tanpui bawk.
Nimin (July 17, 2017) atang khan Kohhran hnatlangin Biak In hlui thiah tan a ni a, Biak In thar tur hi a hma thei ang bera sak tum a ni. Zuangtui Kohhran Commitee chuan chhiat an tawh chungchangah Zorama Kohhran hrang hrangten tawngtaina leh thilpek leh hnatlangah te an tanpui nasa hle tih an sawi a. Kohhran leh mimal thilpek an dawn pawh cheng nuai 19 lai a tling tawh tih sawiin heng thilpek petu leh an kohhran tawngtaipuitu zawng zawng chungah thinlung takin lawmthu an sawi a ni.
