Vawiin (Aug. 17, 2017) khan Pi Zaii Hall, Synod Conference Centre-ah Presbyterian English School (PES) Principals’ Meet neih a ni a, PES 136 atangin Principal 125 an tel a ni. He PES Principals’ Meet hi Rev. B. Sangthanga, Executive Secretary i/c Education chuan a kaihruai a, Upa Dr. H. Lalthanzara, PES Commt. Member-in hunserh hmangin Pu P.C. Vanlalhruaia, Supervisor of PES-in inhmelhriattirna leh hriat tur pawimawh puanna hun a hmang. Chawhma lam session-ah Upa Zochungnunga, Director, Higher & Technical retired leh Synod Education Board Executive Committee member chuan, “School Management” tih thupui hmanga paper a buatsaih chu zirho a ni. Chawhnu lam session chu Upa Lalthianghliman a kaihruai a, Pu Lalvena Hnamte, Principal, Synod Higher Secondary School chuan “Role and Functions of a school Principal” tih paper a buatsaih chu zirho leh a ni. Heng bakah hian tlai lamah General Discussion hun hman a ni a, PES inkaihhruaina tha zawk neih dan tur te, hmasawnna tur kawng hrang hrang te leh Quality Education bakah zirlai nungchang tha tak leh rintlak chher chhuah dan tur kawng hrang hrang sawi ho a ni. Tunah hian Aizawl khawpui leh thingtlang hmun hrang hrangah PES 136 neih a ni tawh a, zirlai zawng zawng hi 28,188 an awm bawk a ni. Kum tharah hian HSLC candidate 500 chuang PES 25 atangin neih beisei a ni. Kumin HSLC Exam-ah khan PES 19 atangin 360 in an exam a, mi 332 (98.22%) an pass a ni.