Mizoram Synod, Family Guidance & Counselling Centre (FG&CC)-in Kohhran hruaitute puala August 9, 2017 atanga Synod Conference Centre-a Church Leaders' Intensive Residential Pastoral Care & Counselling Training vawi 27-na a buatsaih chu August 22, 2017 (Thawhleh) zan khan ‘Final Evaluation & Graduation Service’ neiin khar a ni. Training kharna hun hi Rev. P.C.Pachhunga, Executive Secretary i/c FG&CC chuan a kaihhruai a, Rev. Lalzuithanga, Synod Moderator-in a hmanpui a, training chhuakte hnenah Certificate semin thuchah a sawi. He Counselling Training-ah hian Kohhran aiawh 27 an tel a ni. Training kharna inkhawmah hian Rev. R. Lalhmingthanga, Director, FG&CC chuan inlawmna hun a hmang a, training chhuakte chuan training an hlawkpui dan a lema an ziak chu entirin an hrilhfiah a, Upa H. Lalmuanpuia, New Serchhip chuan training chhuakte aiawha thu sawiin, Chanmari Pastor Bial Zaipawl an zai bawk. He hun hmanpuitu, Synod Moderator Rev. Lalzuithanga chuan training chhuakte fuihna thu sawiin, training chhuakte chuan an thil zirte chu tangkai taka hman tum turin a fuih a. "Lal Isuan, riangvaite hnena Chanchin Tha hril tura min tih angin he hna hi keini pawhin kan chhunzawm zel a ngai a ni" a ti a. "Kan ram hi a dam lo a, siamthat ngai a tam hle, hetah hian Kohhran hruaituten siamthat hna kan thawh loh chuan thawktu tur dang an awm lo. Kan ram damna chu thil dangah ni lovin, Chanchin Thaah chiah a awm a ni." a ti bawk. FG&CC hian Pastor-te pualin Pastoral Care & Counselling Training hi vawi 26 buatsaih tawhin, Pastor 440 training a neihpui tawh a. Church Leader-te puala kum 2002 atanga training a neihpui tawhah, tun tuma mite nen hian Kohhran hruaitu 558 Training pek an ni tawh bawk a ni. Synod hian Counselling Centre paruk - Mission Veng, Bawngkawn, Vaivakawn leh Champhai, Kolasib leh Serchhipah te a nei a. Heng Counselling Centre parukah hian tun thlenga pantu (Client) an neih tawh zat chu mi 19,039 an ni.