Vawiin (Aug. 28, 2017) chawhnu dar 1:00 khan Pi Zaii Hall, Synod Conference Centre-ah Synod Social Front lehkhabu pahnih - ‘Zuin Mizote min nghawng dan zir chianna’ leh ‘Political Education Seminar paper’ chu Synod Moderator Rev. Lalzuithanga’n a tlangzarh. Lehkhabu tlangzarh inkhawm hi Rev. B. Sangthanga, Executive Secretary i/c Social Front in a kaihruai a, Upa H. Lalhmingmawia, Social Front Coordinator-in lehkhabu an buatsaih dan leh a chhan te a sawi a, Synod Moderator Rev. Lalzuithanga’n lehkhabu te hi tlangzarhin thusawina hun a hmang. The Jugglers te an zai a, Upa Lalzuithanga, Zu Research Team Convener leh Political Education Paper ziaktu Pu Lalthlamuana Ralte ten thusawina hun an hmang leh a, Rev. B. Sangthanga’n lawmthu sawina hun hmangin hun tawp a khar a ni. Kum 2015 khan Synod Social Front chuan Zu leh ruihhloin Mizote min nghawng dan zir chianna a lo nei tawh a. Kohhran 267 hnen atang chauha chhanna dawn a nih avangin he zir chianna hi tihchhuah a ni ta lo. Committee chuan hma thar la lehin belhchian dawl leh rintlak tak tur neih tumin hma a la leh a. Study Team, Investigator leh Tabulator te inruatin Research Form mumal taka an siam hnuah hma lak zui a ni a, an peih fel hnuah Synod Social Front Executive Committee-in a lo ennawn leh a, June 2017 khan an peih fel ta a, a bu-a chhut chhuah a lo ni ta a ni. Synod Social Front hian khawtlang nun hruaina thil hrang hrang a buaipuinaah Political Education Awareness Campaign leh Seminar te a buatsaih reng a. Kan hma lawkah ram inthlanpui a lo awm dawn bawk nen kohhran mipuiten politics kan buaipui danah fimkhur tak leh awmze nei taka kan ngaihtuah theih nan kawng dik leh him inkawhhmuh hi a pawimawh hlein a hria a. Bial leh Kohhran hrang hranga Political Education Seminar leh Campaign te chhunzawm reng chungin, District Capital hrang hrangah Seminar buatsaih tum a ni a. Seminar-a hman tur paper ‘Ram rorelna thaa mipui leh kohhran mawhphurhna’ ziak turin Revd Chuauthuama, Ramhlun Vengchhak leh ‘Ram rorelna thaa sawrkar mawhphurhna’ ziak turin Pu Lalthlamuana Ralte, Tuikual te sawm an ni a, a buin tihchhuah a lo ni ta a ni.