Vawiin (Sept. 13, 2017) khan Synod Office Devotion Room-ah Documentary Film ‘Thalaite leh tunlai khawvel’ OST Music Video pahnih chu Synod Moderator Rev. Lalzuithanga’n a tlangzarh. Tlangzarh inkhawmah hian Rev. Lalchungnunga, Director, Campus Ministry in Documentary Film leh OST Music Video an buatsaih chhan te sawifiahin Documentary film tih chhuah tur tihlarna atan OST Music Video an siam dan te a sawi a, Synod Moderator & Campus Ministry Sub-Committee Chairman ni bawk, Rev. Lalzuithanga’n zirlai leh mipui nun hruai nan leh kawng dik zawh zel tura cho nan, Pathian hnenah hlanin a tlangzarh a ni. Campus Ministry hian zirlaite dinhmun dik hriatchiana tanpuina kawnga hmasawnna a awm theih beiseiin Documentary Film ‘Thalaite leh Tunlai Khawvel’ tih chu a siam mek a. He documentary film atan hian zirlaite harsatna te, an hmathlir leh eizawnna lama harsatna awm thei te, anmahni hnen atang leh mithiam, hetiang lam veitu thenkhat te kawmin, zirchian a ni a. He zirchianna hi Film tawia siamin, zirlaite bakah nu leh pa, sawrkar, khawtlang leh Kohhran hoten zirlai/thalaite harsatna kan sut kianpui theihna kawng a awm takin tiin, vantlang hmuh tura tihchhuah turin hmalak mek a ni. He zirchianna atan hian AVI DYNAMICS (Team) te hman an ni a, anni hian zirlai hrang hrangte kawm kualin Video Interview an nei a. Chung atanga thil lo lang atang chuan Documentary Film hi siam a ni ta a, hun rei loteah release theih beisei a ni. He Documentary Film chhuah hma hian, mipuite lo hmelhriattir lawk nan leh tihlar nan OST Music Video pahnih siam a ni a. Harh a hun e - Mawitei & Grace Zodinpuii sak leh Hruaitu Isua - Dr. Zova sak te an ni. Hla te hi ZR Sanga phuah leh music tract pawh a siam vek an ni a, Video thlalak hi SVP (Siama Video Productions) lak a ni a, music recording hi Blue Wave Records tih a ni.