Vawiin (Oct. 13, 2017) chawhma dar 10:00 khan P.C. Girls’ School chuan School Chapel-ah School Day vawi 14-na an hmang a, Rev. B. Sangkhuma, Executive Secretary i/c Education etc. chuan he hun hi a hmanpui. Pi Lallianpuii, Asst. Headmistress-in hunserh a hmang a, Pi Zaithanchhungi, Headmistress-in school report a pe a, a duh apiang tan thusawina hun hman a ni. Hemi bakah hian zirturtu leh zirlaiten item chi hrang hrang 12 lai an nei a ni. P.C. Girls School hi Zosap Missionary ten kum 1903-a an din kha a ni a, kum 2003 khan kum 100-na an lawm tawh a ni. Class A atanga Class VIII thleng zirna a awm a, Primary section-ah zirlai 150 leh Middle Section-ah 311, an vaiin zirlai 461 an awm a ni. Zirtirtu 27 leh staff dang 7, an vaiin thawktu 34 an awm. Guide Caption 7 awmin Guide naupang 75 an awm a, Bulbul Flock Leader 3 awmin Bulbul Flock 47 an awm bawk. He school hian lehkha thiamna mai bakah music te, Pathian thu leh kut themthiamna thil tam tak an zirlaite an chhawm chhuahtir thin a, hei hi an danglamna leh an hlutna a ni. Kum tin Study Tour neih thin a ni a, naupang nungchang tha leh zirna lama titha thlan chhuahte an kal thin. Kumin a Children Science Congress District tina neihah Aizawl District Level-ah Team 2 an tling a, State Level-ah Team 1 tlingin heta Leader hi National Children Science Congress, Gujarat-a neih turah a tel ang.