Rev. C. Lianhmingthanga (Pensioner) kum 71 chu tukin (Nov. 1, 2017) dar 12:25 a.m. khan Aizawl Hospital-ah Heart Attack avangin a thi a, vawiin chawhnu khan Mission Vengthlang Kohhran Biak In-ah Synod Moderator Rev. Lalzuithanga'n a vui.  

Rev. C. Lianhmingthanga hi Upa Vanlallawma (L) leh Pi Vanrumi (L) te fa 11 zinga a upa lam atanga chhiara 4-na niin 4.11.1946-ah Champhai Kahrawt Vêngah a piang a. An unau chu hengte hi an ni-
1. C. Vanlalzika (L)
2. C. Lalmawia (L)
3. Mangchhuani
4. Rev. C Lianhmingthanga (L)
5. C. Lalramthanga
6. C. Lalbiakdiki
7. C. Lalhmangaiha (L)
8. C. Laldina
9. C. Thuamluaia (L)
10. C. Lalrintluangi
11. Upa Hrilthansanga

Lalrinpuii, Aizawl Bungkawn Veng nen kum 1977-ah inneiin fa pali an nei a, chungte chu -
1. Lalhruaitluanga Chawngte
2. John Lalchhuanawma
3. Joel Lianrinzuala
4. Lallawmsangi

te an ni a; an chhungkuain anmahni In Mission Vengthlangah an cheng.

Rev. C. Lianhmingthanga hi thiamna lamah chuan B.A (1974), B.D (1981) a ni a. Kum 1975 - 77 chhûng khân Mission Veng Bial KTP Asst. Secretary niin, kum 1975 - 76, 1978-ah te Mission Veng Bial KTP Secretary a ni. Mission Veng Bial Zaipawl hmasa ber 1976-a din a nih khan Conductor hmasa ber 3 zingah Convener a ni nghal. Kum 1978-ah Mission Vengthlang Kohhran Upa atân thlan a ni a; Pathian thu a zir tâk avângin nemngheh erawh a ni hman ta lo. Sawrkâr hnâ eng emaw chen a thawh hnuah Pathian tana a hun pum pêk a duh avângin a sorkar hna thawh bânsanin 1978-1981-ah Serampore College-ah B.D. a zir a, tha takin a pass a, Second Division-ah pass-in Religion leh Greek subject-ah thiam ber lawmman a la nghe nghe a ni.

Kum 1981 khan Synod-in Pro. Pastor atân a lâ a, 1982-1983 chhûng ZPMK, Kohima Bialah dah a ni a; kum khat chu Bial Secretary mawhphurhna a chelh a ni. 1984-ah Dawrpui Vengthar Bial Pro. Pastor atân sawn a ni a, hemi kum Synod-ah hian Moderator Rev. Lalchâman Pastor atan a nemnghet a, Hnahlân Bial vawng tûra ruat a ni.

Kum 1985 - 1990 chhûng Hnahlan Bialtu Pastor a ni a, kum 1991-1994 chhûng Lunglei Chanmari Bial vawngtu ni chungin Field Incharge (Administrative Secretary tih ni ta) hnâ a kawp bawk. Kum 1995 - 1997 chhûng Co-Ordinator, Synod Revival (tuna Director) hna a chelh a, 1998 - 2002 Administrative Secretary-in Lunglei-ah a awm leh a ni. Kum 2003 - 2006 chhûng Director, Synod Multipurpose Training Centre hna a chelh a. Director hna thawk chungin 2004 - 2005 chhûngin Synod Secretary hnâ a chelh bawk.

Kum 2007 khân pension-in Mizoram Synod hnuaia a rawngbâwlna chu a chawlhsan ta a ni.

Tunah hian Aizawl Chhimthlang Presbytery aiawha SEC member ni lai a ni. Rev. C. Lianhmingthanga hian mi 1453 a baptist a, nupa tuak 136 a inneihtîr bawk a ni. Hun eng emawti atang khân thisen sâng leh zunthlum vângin harsatna neuh neuh chu a nei ve thin a. Damdawi nên inenkawlin a in-control ve hrâm hrâm a. Rawngbawlna dangah pawh tel ve zêlin ATC buatsaih Kohhran Siamthat kum 500 tlin lawmna, 31.10.2017-a Chanmari Kohhran, Aizawla neihah pawh a la tel a. Hei hi Biak Ina a hun hman hnuhnung ber chu a ni ta a ni. Dt. 31.10.2017 zanlai dar 12 vel khân a thaw a rawn hah avangin rang taka Aizawl Hospital panpui a ni a. Theih tâwpa an enkawl chung pawhin zanlai dar 12:25 khân min lo peih lohsan ta a ni. 

VUINA PROGRAMME
A hun : Ni 1.11.2017, 1:30 PM (Nilaini)
A hmun : Mission Vengthlang Kohhran Biak In
Vuitu : Rev. Lalzuithanga, Moderator, Mizoram Synod
Hla sak ho : Muan, muanna kim! (KHB No. 418)
Chanchin sawi : Rev. Lianhmingthanga Sailo, Synod Secretary
Zaipawl : Mission Vengthlang Kohhran Zaipawl
Thlamuanna Thuchah : Vuitu
Tawngtaisakna : Rev. Lalramliana Pachuau, Senior Executive Secretary, Mizoram Synod
Hla sak ho : Khawvêl hi bo mah se (KHB No. 150)
Malsawmna : Rev. H. Remthanga, Finance Officer, Mizoram Synod
Thlanmual : Pastor Laldinthara, Bialtu Pastor