Vawiin (Nov. 2, 2017) chawhma dar 10 khan Synod Office-a JM Lloyd Hall-ah Synod Worship Committee vawi 3-na a thu a, meeting hi Rev. Lalzuithanga, Synod Moderator-in a kaihruai. Tun tumah hian kum 2018 -2019 Budget ruahmanna te, malsawmna sawi tura sawmte dinna hmun tihchian thu te, Pathian Biak Inkhawm Hruaina Bu enthat thu te, Synod Worship Committee Inkaihhruaina siam chungchang te, Synod Music School tihhmasawn chungchang te an thlir ho a ni. Secretary report danin Worship Department hnuaia Music Cell-ten October 2016 atanga September 2017 chhungin Bial huap Training leh Seminar hmun 16 ah an neihpui a, Kohhran mal tan hmun 22 ah an nei a. Worship Cell te Kohhran 6 ah rawngbawlna neiin an fehchhuak bawk. Synod Music School-a hman tur Electric Piano 3 leh Upright Piano 1 lei thar a ni a, Mizo hlapuite humhalha vawn that a nih theih nan Hlapui Bu siam rel a ni a, hla 146 lakhawmin a bu-a chhuah tura thlan fel a nih thu te, Bru Christian Fellowship, Aizawl chuan Kristian Hla Bu-a hla 70 a thluk lak chhuah an dil remtih a nih thu te, Synod Executive Committee thu angin Beihrual kum 100-na hriatrengna hman dan tur siam a ni a, kum 2018 Nilai leh Beihrual Thupui Bu-ah telh a nih thu te, Kristian Hla Bua hlate sa thiam vek tura ngenna Kohhran tinah thawnchhuah a nih thu te ngaihthlak a ni. Synod Music School-ah tunah hian Instructor 5 an awm mek a, Solfa zirna (Tonic & Staff Notation) hi thla 3 course a ni a, zirlai 262 an awm mek a, Vocal Class hi kum khatah session 2 an nei a, zirlai 28 an awm mek a, Violin Class pawh kum khatah session hnih awmin zirlai 42 an awm mek a, Keyboard class pawh kum khatah session hnih an nei a, hemi bakah hian nipui laiin (April - September) shift/class khat, tlai lamah an neih belh a, zirlai 165 an awm mek bawk. Vocal, Violin leh Keyboard class-ah hian theory leh practical in an zirtir thin a ni.