Synod Executive Committee ni thum awh tur chu Nov. 7, 2017 atang khan Synod Office a Lloyd Hall-ah an thu a, meeting hi Synod Moderator Rev. Lalzuithanga’n a kaihruai a, Synod Secretary Rev. Lianhmingthanga Sailo-in report a pe. SEC meeting hi vawiin (Nov. 9, 2017) ah zawh tura ruahman a ni. Secretary report-ah chuan – Shillong Mizo Kohhran leh Shillong Baptist Kohhran ten Biak In chungchanga inremna thuthlung an siam tawh a, inremna inkhawm pawh Oct. 15, 2017 khan neih a nih thu te, Rampum Huap Kohhran Pavalai Pawl Meet neih a nih thu leh hemi denchhena Rampum huap beihpui atana Speakers puala training neih a nih thu te, kum 2018 a MLA General Election lo awm tur puala rampum huap beihpui neih mek a nih thu te, MKHC ngenna anga “Ruih hlo laka kan fihlim theih nan leh ruihhlo bawiha tang mek te tan” tih thupui hmanga Kohhranhote tawngtai rualna neih a nih thu te, Manipuri Presbyterian Church enkawl zui zel dan tur ruahman mek a nih thu te tar lan a ni a. Synod 2016 in a phal angin Synod Hospital a Doctor 8 ten June 2017 atanga Limited Private Practice an neih tan thu te, Kohhranhote nena inhriatpawhtawnna tha zawk a awm theih nana Synod Hospitala Doctor 25 te Presbytery Inkhawmpui hmun 9 a an kal thu te, Synod Hospital-ah Dental Unit chu kum thum chhung atan Out-Sourcing anga kalpuia nih rih tur thu te pawh tarlan a ni a. Tedim Synod ten tuilian an tuar avangin Rs. 2,50,000/- a tanpui a nih thu te, Mizorama Kohhran Inpumkhatna leh thawhhona chungchanga Seminar Paper Rev. Dr. H. Vanlalauva buatsaih chu a bu-a chhuah a nih tawh thu te tarlan a ni bawk. Tun tum SEC –ah hian thurel tur 92 lai a awm a, chung zinga langsar zual deuh te chu – Synod Higher Secondary School –a Section hawn belh chungchang te, Kristian organization kan thawhpui te sum a tanpui chungchang te, Mission Field a in sak te, India ram khawpui liana Biak In hmun leina tur Budget ruahman te, Synod dang nena partnership neih chungchang te, Synod Department thenkhat inkaihhruaina enthat te, Kohhran Pavalai Pawl Inkaihhruaina enthat te, Synod Hospital-a Nursing College hawn chungchang te a ni hlawm a. Presbytery atanga thu lut – Campus Ministry tihlen te, Synod Conference hman dan fimkhur zawka kalpui chungchang te, Mizoram Kohhran Hmeichhe Inkhawmpui Lian-a General Secretary ruat dan enthat te, India ram khawpui hrang hrang a Presbyterian Kohhran din a nih chhan Kohhranhote hnena chiang zawk a hrilhfiah rawtna te, Church of North India leh Church of South India te nena kan thawhhona tichak rawtna te, Zoram pawn Kohhrante Sawrkara in register phalsak ve rawtna te, Nupa chungchang Dan leh Kohhran Pawl dang nena inkungkaihna Dan bu a “Mo lawm chungchang” hi uar zawka inzirtir rawtna te leh a dangte an ni.