Nizan (Nov. 16, 2017) khan KTP General Conference 2018 Hla Bu chu Rev. Zothansanga, CKTP Leader in Synod Conference Centre-ah a tlangzarh.
Tlangzarh Inkhawm hi Pu Zonunsanga Ralte, Hlabu Sub Committee Chairman-in a kaihruai a, Tv Robert Lalduhzuala, Sub Committee Secretary in Gen. Conference Hla bu buatsaih dan report a pe a, Mizoram Synod Choir ten KTP General Conference 2018 Theme Song tur an sa bawk.
General Conference Hla bu ah hian hla 50 a awm a, 2016 General Conference Hla bu a awmlo hla thar 21 dah luh a ni a. Heng hla te hi mi hrang hrangin hla bua telh tura an thehluh atanga thlante leh kan rama Pathianin a hman tak tak, Fakna hla phuahtu te hla a ni hlawm.
Hla bu cover hi KTP member a duh apiang tana design theih a siam a ni a, design hrang hrang thehluh atang chuan Lalbiakchhawna Fanai, Khatla North design chu tun tum Conference Hla bu kawm atan thlan a ni ta a ni.
General Conference Hla bu hi Copy 50500 siam niin Rs. 50/- man tur a ni a, spiral binding chu Rs. 60/- a ni ang a, A4 size (hla bu lian) chu Rs. 100/- man a ni. Synod Bookroom Headquarters Show Room leh Branch hrang hrangah lei theih a ni a, a hlawma la duh KTP Branch te tan 10% discount a ni ang. Hla bu te hi hi nizan tlangzarh zawh hian 10000 copies zet tihral nghal a ni.