Mizoram Presbyterian Kohhran chuan nakkum 2018-a Nilai leh Beihrual Thupui leh Puitling Sunday School zirlaibu tur a tichhuak ta. Heng lehkhabu pahnihte hi Mizo lehkhabu malkhaiah chuan copy chhut chhuah tam berte an ni a. Puitling Sunday School zirlaibu hi copy 80,000 zet chhut niin, Nilai leh Beihrual Thupui hi copy 65,000 chhut a ni. Nakkum 2018 hian Mizoram Presbyterian Kohhran chuan Puitling Sunday School-ah “Chronicles I & II hrilhfiahna” ih an zir dawn a. He lehkhabu hi Presbyterian Pastor-te zinga mithiam Rev. Dr. Lallawmzuala ziah a ni a. He zirlaibuah hian zirlai 47 awmin phek 300 zeta chhah a ni bawk. Tunah hian Mizoram puma Synod Bookroom dawr zawng zawngah lei theih tura chhawp chhuah mek a ni a, Rs. 100/- a lei theih a ni ang. Mizoram Presbyterian Kohhran Puitling Sunday School zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) hnuaia Phai Synod pumpui chuan an zirlaibu atan an hmang ve nghal zel a. Presbyterian Church of Myanmar leh Mizoram Synod Partnership Agreement angin Mizoram Synod chuan kumtin copy 1000 zet a thlawnin Presbyterian Church of Myanmar hi a pe thin a ni. Kum 2018 Nilai leh Beihrual Thupui zirlai thupui hi “Thuthlung Hlui leh Thuthlung Thar Inkar Thu” tih a ni dawn a. Mizoram Synod Moderator pawh lo ni tawh leh Presbyterian Pastor-te zinga mithiam, Rev. Thangzauva ziah a ni a. Thuthlung Hlui leh Thuthlung Thar Inkar Thu chungchang hi Pathian thu hriatzauna kawngah hmun pawimawh tak luahtu a nih avangin Presbyterian Kohhran chauh ni lo, Mizo Kristiante tan lehkhabu tangkai tak tur a ni. Nilai leh Beihrual Thupui hi Mizoram puma Synod Bookroom dawr zawng zawngah lei theih tura chhawp chhuah tawh a ni a, Rs. 130/- a lei theih a ni thung ang. Tun tum Thupui bu hi phek 307 zeta chhah ni mahse Synod-in a chhut man a tum avangin Synod Bookroom chuan Rs. 130/- chauhin a hralh thei dawn a. Hei bakah hian Kohhran Upa leh Pastor-te’n a thlawnin an dawng thei dawn bawk a ni.