Vawiin (Nov. 28, 2017) chawhnu dar 1:00 khan SMTC Building thar chu Rev. P.C. Pachhunga, Executive Secretary i/c SMTC in Pathian hnenah hlanin a hawng.
Building thar hawn leh hlan hma hian SMTC Lecture Hall-ah hun hman hmasak a ni a, Rev. Vansawma, SMTC Programme Director-in kaihruaiin tanna leh inlawmna thu te a sawi a. Upa Vanlalhuma, SMTC Office Assistant chuan SMTC Reports a pe a, T.Upa Thangliankhuma, Synod Office-a Assistant Engineer chuan Technical Report a pe. Pi Lalruotmawi tum hnih a zai a, Rev. Lalchhawnkima, SMTC Managing Committee member-in Malsawmnain programme a khar a ni.
Hun khatna hman zawh hian Rev. P.C. Pachhunga, Executive Secretary chuan SMTC Building thar chu Pathian hnenah hlanin a hawng nghal a ni.
SMTC Building sak hna hi Synod Trust Committee (Synod Property Committee) enkawlna hnuaiah sak a ni a, Ground Floor, a building khawchhak lam hi Lay Leaders’ Training Hostel atana ruahman a ni a, a building khawthlang lam hi Programme Director Quarters atana ruahman a ni. Basement-I Floor pumpui hi Hmeichhe Hostel atana ruahman a ni a, Basement-II Floor pumpui hi Mipa Hostel atana ruahman a ni thung. Basement-III zahve a khawchhak lam chu Garage tura ruahman a ni a, khawthlang lam hi Kitchen cum Dining Hall atana ruahman a ni. A building laiah Main step, a floor pumpui inkalpawh theihna tur siam a ni bawk. A building hi a chung zawnga sak zawm belh theih tura ruahman a ni.
Building sakna atana estimate hi Rs. 4,28,63,700/- a ni a, a sak zawhna atan Rs. 5,59,37,962/- sen a ni. Estimate aia hman tam a nih chhan hi Estimate a awm lo, thawh ngei ngai si, a kawmthlang retaining wall siamna te, side drain siamna te, a tira ruahmanna a tel lo Kitchen cum Dining Hall siam belh nan te leh a building khawthlang lam lei laih nan a hman a nih vang te a ni.
