Mizoram Synod, Family Guidance & Counselling Centre (FG&CC)-in Pastor-te puala November 15, 2017 atanga Synod Conference Centre-a Intensive Residential Pastoral Care & Counselling Training vawi 27-na a buatsaih chu November 28, 2017 (Thawhleh) zan khan ‘Final Evaluation & Graduation Service’ neiin khar a ni. Training kharna hun hi Rev. P.C.Pachhunga, Executive Secretary i/c FG&CC chuan a kaihhruai a, Rev. Lalramliana Pachuau, Senior Executive Secretary-in a hmanpui a, training chhuakte hnenah Certificate semin thuchah a sawi. He Counselling Training-ah hian Mizoram Synod Pastor 17, Tripura Provisional Synod Pastor 1 leh Phai Synod (Myanmar) Pastor 3, an vaiin mi 21 an training a ni. Training kharna inkhawmah hian Rev. R. Lalhmingthanga, Director, FG&CC chuan inlawmna hun a hmang, Training chhuakte chuan training an hlawkpui dan a lema an ziak chu entirin an hrilhfiah a, Pastor Samuel Lalmuanpuia Pachuau, Sakawrdai bialtu chuan training chhuakte aiawha thu sawiin, Khatla Pastor Bial Zaipawl an zai bawk. He hun hmanpuitu, Sr. Executive Secretary Rev. Lalramliana Pachuau chuan training chhuakte chuan an thil zirte chu tangkai taka hmang tura fuihin, "Kohhran mite hi kawng tinrengah kan ngaihsak a, an harsatna chi hrang hrangahte tanpuitu nih hi kan rawngbawlna tur pawimawh ber a ni" tiin training chhuakte a fuih. FG&CC hian Pastor-te pualin Pastoral Care & Counselling Training hi vawi 27 buatsaih tawhah Pastor 461 an training tawh a. Church Leader-te puala kum 2002 atanga training a neihpui tawhah Kohhran hruaitu 558 Training pek an ni tawh bawk a ni. Synod hian Counselling Centre paruk - Mission Veng, Bawngkawn, Vaivakawn leh Champhai, Kolasib leh Serchhipah te a nei a, Lunglei leh Mamit-ah Centre hawng leh turin hma lak mek a ni bawk. Heng Counselling Centre parukah hian tun thlenga pantu (Client) an neih tawh zat chu mi 20,029 an ni.