Synod Worship Dept chuan Nov. 28, 2017 (Thawhlehni) zan atang khan zaipawl conductor training, Residential Choir Conductors' Training vawi 22-na chu Synod Multipurpose Training Centre, Mission Vengthlangah a buatsaih a, Dec. 2, 2017, Inrinni zing thleng khan training hi neih a ni a, Dec. 1, Zirtawpni zanah a kharna hun hman a ni ang. Thawhlehni zan khan Residential Choir Conductors' Training hawnna inkhawm neih a ni a, he inkhawm hi Upa Laldingliana Sailo, Synod Worship Cell Committee member chuan a hruai a, Pathian hnenah he training hi hlânin, Synod Worship Department Coordinator, Pu Rochungnunga'n inhmelhriattirna hun hmangin report a pe. Rev. Vansawma, Programme Director, Synod Multipurpose Training Centre chuan thu a sawi a, Executive Secretary i/c Worship, Rev. B. Sangthanga'n thuchah a sawi. Training hi Dec. 1, 2017 (Zirtawpni) zan dar 6:00-ah a kharna inkhawm neih tur a ni a. Kharna inkhawm hi Upa Ralkapthanga Sailo, Worship Cell Committee-in a kaihruai ang a, Pu Rochungnunga, Synod Worship Dept. Coordinator-in report pein, Rev. B. Sangthanga, Executive Secretary i/c Worship chuan thuchah sawiin Certificate a sem ang. Residential Choir Conductors' Training hi kum 1995 kum atang khan buatsaih tan a ni a, kohhran zaipawl tha a awm theih nan te, zaipawl hruai dan inzirtir nan te, music leh zaia hma kan sawn theih nantea buatsaih a ni. Mizoram chhunga Pastor Bial hrang hrangte a inchhâwka koh thin an ni a, tun tumah hian Pastor 18-a zaipawl conductor-te tel tura koh an ni a, bial 12 atangin zaipawl conductor 28 an tel thei a ni.