Synod Inkhawmpui vawi 94-na chu December 5-10, 2017 chhung khan Bungkawn Kohhran Biak Inah tluang taka neih a ni.

Kumin Synod Inkhawmpui thlarau lam thupui hi ‘Kohhran – Pathian Chhungkua’ (Ephesi 2:19) a ni a, December 9, 2017 (Inrinni) zanah Rev. Lalbiaknia, Chaltlang-in thlarau lam thupui hmang hian Pathian Thuchah a sawi.

Kumin 2017 Synod Inkhawmpuia Synod Puipate chu :

Moderator : Rev. F. Lalrinnunga
Secretaries : Rev. Lianhmingthanga Sailo (Sr.), Upa R. Dengzikpuia (Jr.)
Finance Officers : Rev. P.C. Pachhunga, Rev. H. Remthanga
Statistician : Upa Dr. H. Vanlalhluna
Executive Secretaries : Rev. Lalramliana Pachuau, Rev. B. Sangthanga

Synod Inkhawmpui hi kum 2010 atang khan Bial-in an thleng tan a, kum 2010 – ah Dawrpui Pastor Bialin Zarkawt Kohhranah thlengin kum 2011 khan Khatla Bialin Khatla Kohhranah an thleng a, kum 2012 khan Chanmari Bialin Chanmari Kohhranah an thleng leh a, kum 2013 khan Ramhlun North Bialin Ramhlun North Kohhranah an thleng a, kum 2014 khan Mission Vengthlang Bialin Mission Vengthlang Kohhranah an thleng a, kum 2015 khan Tuikual Bialin Tuikual Kohhranah an thleng a, nikum (2016) khan Durtlang Bialin Durtlang Kohhranah an thleng a ni.

December 5, 2017 zan khan Palai lawmna leh report inkhawm neih a ni a, Moderator tang lai Rev. Lalzuithangan palai lawmna thu sawiin kum 2017 chhunga Synod Report a pe bawk. December 6, 2017 khan Rorel inkhawm tan hmain Moderator kal chhuak Rev. Lalzuithanga’n Moderator thar, Rev. F. Lalrinnunga hnenah Moderator mawhphurhna a hlan a, rorel tan nghal a ni. Kumin hian Nomination Committee thu 10, Pastoral 16 leh General Agenda 59 zet ngaihtuah a ni. Synod Rorel inkhawm hi Inrinni thlenga neih tura ruahman a ni a, zan lamah vantlang Pathian biak inkhawm neih thin a ni ang. Rorel hi chhun lamah an zawh hman loh avangin zan inkhawm banah neih chhunzawm a ni a, tluang takin an zo thei a ni.

Pathianni chawhmaah Pastor 25 nemnghetin Pro Pastor 16 dah ngheh an ni a, chawhnu lamah Synod Moderator Rev. F. Lalrinnunga’n Lalpa Zanriah Sacrament a theh a, Minister chatuan ram pan te sunna hun hman a ni bawk. Zan inkhawmah Moderator kal chhuak Rev. Lalzuithanga’n Valedictory Sermon a sawi. Synod Inkhawmpuiah hian palai in report zat chu mi 2129 an ni.

 Kum 2021 Synod Inkhawmpui chu Republic Veng Kohhran Biak Inah, Republic Veng Bialin an thleng dawn a ni. Kum 2011 Synod Gen.12-in a rel angin Synod Inkhawmpui thlengtu tur kum thum hma lama lo ruat lawk thin a ni a, ruat lawk tawhte chu – kum 2018-ah Electric Veng Bialin Electric Veng Kohhran Biak In-ah an thleng ang a, kum 2019-ah Mission Veng Bialin Mission Veng Kohhran Biak In-ah an thleng leh ang a, kum 2020-ah Dawrpui Bialin Dawrpui Kohhran Biak In-ah an thleng ang.  

Nakkum (2018) Synod Inkhawmpui Moderator tur chu Rev. R. Lalhmingthanga, Mission Veng a ni ang a, Thlarau lam thupui atan ‘I ram lo thleng rawh se’ (Mt. 6:10) thlan a ni a, Rev. Dr. Vanlalnghaka Ralte, ATC a sawi ang. Agenda atangin HIV/AIDS dona kawnga hma lak chungchang leh Synod hnuaia hun puma thawkte zuk leh hmuama inthiar fihlim tura rawtna chu Synod Executive Committee hma lak zui turin pawm a ni a, Secular College din rawtna chu a hmun tur thlan fel leh bawhzui ngaite bawhzui turin Synod Executive Committee kutah dah a ni a. PCI Danpui enthatna atana rawtna nei chuan February 2018 Synod Executive Committee thut huna en theih turin January 2018 chhungin Synod Secretary hnenah thehluh theih a ni.Synod Service Rules 2018 enthatna chu siam that tur nei leh belh tur rawtna nei chuan Synod Secretary hnenah January 2018 chhungin thehluh theih a ni ang a, bawhzui ngai ang ang chu Synod Executive Committee in hman nghal theih turin lo bawhzui rawh se tih a ni a, Recruitment Rules & Schedule leh thil danga a nghawng pawh Synod Executive Committee in siam thain hman nghal turin lo umzui se tih a ni. Medical Re-imbursement Bill dan kal hmang enthat thu pawh rawtna leh siam that ngai neite chuan January 2018 chhungin Synod Secretary hnenah thehluh theih a ni a, Synod Executive Committee in lo ennawnin hman nghal turin lo siam tha rawh se tih a ni. Agenda zing atangin Israel rama Chanchin Tha hril dan kawng zawn thu leh Mizorama kan grep thar chhuah hi Lalpa Zanriah Sakramen (Uain) atan hman rawtna chu a tlang lo langsar zualte an ni.

Kum 2018-a Pastoral Ministry thupui atan “Pathian leh Kohhran tana rinawm” Thup. 2:10 chu thlan a ni. Kum 2018 Synod Inkhawmpuia Puipa turte chu :

Moderator : Rev. R. Lalhmingthanga, Mission Veng
Secretaries : Upa R. Dengzikpuia, (Sr.), Maubawk, Rev. R. Vanlalnghaka (Jr.), Synod Rescue Home
Finance Officers : Rev. P.C. Pachhunga, Rev. H. Remthanga, Mission Veng
Statistician : Rev. R. Lalnuntluanga, Chawnpui
Executive Secretaries : Rev. Lalramliana Pachuau, Rev. B. Sangthanga

Synod 2017 Bulletin 1
Synod 2017 Bulletin 2
Synod 2017 Bulletin 3  

Synod inkhawmpui tan zan atanga a tawp thlengin vantlang Pathian biak inkhawm te hi Synod Information & Publicity Department ten video-in an cover a, Hruaina Eng TV channel-ah live-telecast thin a ni.