Nimin (Dec. 13, 2017) chawhnu dar 1:00 khan Women Centre, Phunchawng-a Puanthui zir Third Batch leh Puan tah First Batch te thlahna hun hman a ni. Thlahna inkhawm hi Central Kohhran Hmeichhe Chairman Pi K. Lalliantluangin a kaihruai a, Central Kohhran Hmeichhe Secretary Pi Lalpianthangi Hrahsel hnen atangin thupuan ngaihthlak a ni. Nl. R. Lalrinpuii, Centre Superintendent hnen atangin report tawi ngaihthlak a ni a, Chairman kal chhuak tawhten zirchhuakte hnenah Certificate an hlan a, Rev. P.C. Pachhunga, Executive Secretary hnen atangin fuihna thuchah ngaihthlak a ni. Zirlaite hnen atangin Solo, Group Zai leh Zaipawl ngaihthlak a ni a, zir chhuak tawh chhungte, zirlaite bakah aduh apiang tan thusawina hun hawn a ni bawk. Women Centre-ah hian August 2016 atangin bul tan a ni a, Puanthui (thla 6 course) zirlai mi 40-in bul an tan a, Zirtirtu mi 2 an awm. Kumin (2017) July thla atang khan puantah tih belh leh a ni a, mi 10 in an zir tan a. Tun tumah hian zirlai 45 in tha takin an zirchhuak a, zirchhuak tawh zawng zawng hi an vaiin mi 115 an awm tawh a ni. Nakkum (2018) atang chuan an thiam bel leh zual nan puanthui leh puantah hi kum khat course a ni tawh dawn a ni. Puanthui zir tur mi 40 lak fel tawh an ni a, puantah zir duh tan seat 10 a la awm thei a, January 10, 2018 ral hmain a duh chuan la dil theih a ni.