Synod Hospital, Nursing School chuan nimin (Dec. 13, 2017) chawhnu dar 1:00 khan Oath Taking & Lamp Lighting Ceremony vawi 44-na, Synod Hospital Chapel-ah an hmang a, Synod Moderator Rev. F. Lalrinnunga chu Khuallian a ni. Dr. L.H. Thanga Singson, Hospital Director-in inlawmna thu a sawi a, L. Zotawni, Ward Sister-in Bible chhiar leh tawngtaiin hunserh a hmang. Pi C. Lalrintluangi, Principal-in report a pe a, Pi Lianthangi, ANS Retired-in Oath taking leh lamp lighting hun a hmang bawk. First Year GNM ten Group Zai an nei a, Khuallian Rev. F. Lalrinnungan lawmman semin fuihna thuchah a sawi. Hemi zawh hian Nu leh Pa a duh apiang tan thusawina hun hawn a ni bawk. Pi R.C. Lalrengpuii, Sister Tutor-in lawmthu sawina hun a hmang a, Rev. R. Ramdinmawia, Hospital Chaplain-in Malsawmnain inkhawm a tin a ni. Kum 1928-a Synod Hospital din anih atang khan Nursing School hi din ve nghal a ni a. GNM Course hi kum 3½ chhung zir a ni thin a, October 2016 atangin kum 3 chung zir turin Indian Nursing Council in syllabus an rawn siam ta a ni. Synod Hospital, Nursing School atanga zir chhuak tawh zawng zawng hi an vaiin mi 1500 chuang an tling tawh a, tunah hian zirlai awm zawng zawng chu mi 125 an ni. Kum 2017 Mizoram Nursing Council hnuaia Final Examination-ah First Year exam mi 30 atangin Top Ten-ah mi 5 an lang a, Second Year exam mi 29 atangin Top Ten-ah mi 7 an lang a, Third Year exam mi 33 atangin Top Ten an nei lo thung a ni.