Tukin (Jan. 10, 2018) zing dar 7:00 khan Synod Moderator Rev. F. Lalrinnunga'n Nursing College building lungphum a phum. Synod Hospital, Durtlang-a Nursing School chu Nursing College-a hlankai turin Synod Inkhawmpui 2017 khan a lo rel tawh a. Nursing College Building hi sak that a tul tawh avangin a sakna tur sum NEC-ah dil a ni a, College building sakna tura pawm Cheng Nuai 833 atangin Cheng Nuai 749.70 chu NEC atang hian hmuh beisei a ni. College building hi a dung fit 150 leh a vang fit 45-a zau, chhawng li (4)-a sak tur a ni a, zirlai mi 140 vel leng thei tur a ni. Nurse zirna hi kum 1928 atanga tan tawh a ni a, Mizorama Nurse zirna hmahruaitu a nih bakah Christian Nurse tha chher chhuahna hmun pawimawh tak a ni.