Mizoram sorkar-in Mizoram Synod hnena a hlan tâk Sikulpui, Mission Venga mi chu October 16, 2020 khan a hawnna inkhawm buatsaih a ni a; Synod moderator Rev. R Lalchangliana'n hawngin, School Education Minister Lalchhandama Ralte-in a hmanpui.
Sikulpui hawnna inkhawm hi Rev. K. Lalrinmawia, Executive Secretary incharge Education-in a kaihruai a, P.C Girls’ Headmistress Nl. Zaithanchhungi’n hunserh a hmang a, Synod Education Board Secretary Pu Lalvena Hnamte-in Report pe-in thawktute inhmelhriattirna nei a, Rev. J. Lalremsiama, Synod Statistician-in thawktute Pathian hnenah tawngtaiin a hlan a, Synod Moderator Rev. R. Lalchangliana’n Sikulpui hawngin thuchah a sawi a, Moderator chuan he zirna In hi Pathian ram dinnghehna leh chanchin tha pawh dik taka a than chhoh zel theihna tur atana hmanraw tangkai tak lo ni sela, Mizoram tana mi hman tlak, khawtlang leh chhungkaw tan pawha chhenfakawm anlo nih theihna turin zirtirtuten theih tawpa tan la turin a fuih a, thinlung leh tihtak zeta missionary rilru pua thawk turin a chah bawk.
School Education Minister Pu Lalchhandama Ralte pawhin thusawiin Sikulpui a taka kalpui tura hawn a ni leh ta chu lawmawm a tih thu sawiin, zirtirtute chu textbook knowledge ringawt ni lo, naupangte theihna phawrh chhuahsak tura an theihna hmang turin a chah a; sorkar hnathawk tur lehkhathiam ringawt ni lo, private sector thlenga chhawr tlak mithiam chher chhuah tum turin a fuih. Sorkar, kohhran leh khawtlangte tangrualin Sikulpui chu ram siamthatna hmun pawimawh taka an siam leh theih nan Education Minister chuan duhsakna a hlan a ni.
A duh apiang thusawina hunah Prof. J.V. Hluna, Pu P. Rohmingthanga, Convener, INTACH, Mizoram Chapter, Pu James Lalrinchhana, Director, School Education, GOM leh Pu Lalhruaitluanga Ralte, General Manager, PresCom ten thu an sawi bawk. Sikulpuia thawktuten hla pahnih an rem bawk.
Sikulsen (Boys' Primary School) leh Sikulpui (Boys' Middle School) kai kawpa Sikulpui tia vuah tâk hi Zosap missionary-te'n an din a ni a, kum 1952 atanga kum 2019 thleng (kum 67 chhung) Mizoram sorkarin a enkawl hnuah May 29, 2019 khan Mizoram Synod kutah a hlan lêt leh a ni. Sikulpuiah hian zirtirtu 13 leh zirtirtu ni lo thawktu dang pathum an awm mek a ni.
For more pics Click Here